أخبار ومناقشات الفرقة الرابعة

السلام عليكم اولا

و اهلا و مرحبا بكم ثانيا فى عام دراسى جديد و سعيد عليكم ان شاء الرحمن


الحقيقة مش عام دراسى جديد او سنة جديدة فقط

لاااااااااااا

انها البداية الحقيقية للسنوات الكلينيكال

اللى هنبتدى فيها نطبق ما كنا قد درسناه فى سنوات تعليمنا الثلاث التمهيدية و التأسيسية ..

يعنى لو اخدت اناتومى او فيسيولوجى و زعلان قوى انك ضيعت عمرك عليهم

اطمئن هتجنى ثمار ( تفوقك و فهمك ) للاناتومى و الفيسيولوجى و طبعا يا شطار هنعرف ليه دكاترة الاناتومى و الفيسيولوجى او الهيستولوجى و البايو كانوا بيقولولكم ذاكروا المواد دى صح علشان اهميتها فى السنوات الكلينيكال .



طيب يا دكاترتنا العظام و الباثولوجى و الفارما اللى معلمة على كل طالب مننا


طبعا هنعرف اننا مضيعناش سنوات تعليمنا و ساعات و ايام مذاكرتهم هبااااااءا

اخيرا هقدر احس بأنجاز فى الكلية دى


________

المهم

مقدمة طالت

و اعدكم الا اطيل

*********

فترة جديدة بقواعد جديدة و نظام جديد و تفكير جديد و هو ده الفيصل

لو غيرت تفكيرك فى كل شىء الفترة الجاية هتتمتع بشكل غير عادى و هتعدى عليك كالنسمة الصيفية الهادئة

و اتمنى

( امل - و طموح - و سعى - و اهداف )

جديدة

مش مهم انت عملت ايه فى السنين اللى فاتت

اينعم لو كنت قوى فيهم هتكون كسبت كتير بس حتى لو موفقتش ايضا ممكن تخرج من الكلية منتصر و محقق اهدافك

ركز فى سنين الكلينيكال علشان تتعلم صح

و بالتالى تكون دكتور صح

**********

الجديد فى النظام هو انك عندك اربع مواد جداد

1 - رمد

2 - انف و اذن و حنجرة

3 - كوميونتى او الصحة العامة و طب المجتمع

4 - الطب الشرعى ( يا ساااااااااتر )

**************

عندك نظام تقسيمة جديدة

الدفعة هتتقسم اربعة و كل راوند ( ايوة التسمية بعد كدة هتبقى راوند )

يعنى ناس هتاخد راوند الرمد و التانى الانف و اذن و الثالث كوميونتى و الرابع شرعى

طبعا الترتيب مش ملزم بس علشان لو اتسألت عندك راوند ايه تقول بكل ثقة و عزة نفس عندى راوند شرعى

او لو اتسألت انتى فى الراوند الكام تقول برده بكل عزة نفس فى الراوند الثالث

( يعنى المجموعة الثالثة )



هتدخلوا المستشفى اخيرااااااااااااااا

انتوا كبار بقى . و ده فى راوندين اللى هما

- الرمد

- ent

و الباقى السكاشن بتاعته ( او لنقل الراوندات ) هتبقى داخل حجرات القسم




دى بس كانت مقدمة مختصرة و هشرح كل حاجة مفصلة ان شاء الله




اهلا مرة تانية ...


دلوقتى مش عارف ارتب افكارى

فيه حاجات كتير عايز ارغى فيها و مش عارف ابدأ منين و انتهى فين

..

طيب


مبدأيا كدة هنتفق على شوية حاجات

1 - الكلام ده عن نظام الفرقة الرابعة للعام السابق اللى انا كنت فيه
يعنى عن السنة الدراسية 2008 / 2009


2 - طبعا الكلام هيبقى خليط من العامية و الانجليزية و الفصحى ...

3 - اى استفسار زى ما قلتلكم يبقى فى موضوع الاستفسارات .

__________

كلام عام قبل الدخول فى تفاصيل المواد

- 1 -
الدرجات


الدرجة الكاملة من 950


مقسمة على حسب المواد كالآتى
1 - الرمد 250
2 - انف و اذن 200
3 - شرعى 200
4 - كوميونتى 300

- 2 -
معندناش نظام ترم
يعنى الراوند بيخلص و نمتحن فيه امتحان اسمه امتحان الراوند و غالبا بيبقى بدرجة قليلة يعنى انف و اذن كان من 35 رمد كان من 50 كوميونتى كان من 60
شرعى كان من 25


و بالتالى غالبا الترم بيبقى فيه راوندين ..



- 3 -
المحاضرات بتختلف على حسب المادة
يعنى
1 - انف و اذن المحاضرة يوميا فى المدرجات
2 - كوميونتى المحاضرة ايضا فى المدرجات
3 - شرعى ايضا المحاضرة فى المدرجات
4 - الرمد فقط المحاضرة فى القسم اللى هو داخل المستشفى



- 4 -
العملى بيختلف على حسب المادة
انا هتكلم عن مواد الكلينيكال الرمد و الانف و اذن
لان الباقى لهم نظامهم العملى الخاص و خاصة الكوميونتى اللى بيعتبرمن اروع المواد فى الكلية فى نظامه العملى .


الكلينيكال بيتاخد يوميا فى القسم و بيتعرض حالات و بيتشرح عليهم و الناس كلها المفروض تحافظ على انها تشوف حالات كتير و متستهترش لاننا بنيجى فى الآخر و بنتزنق فى الامتحان العملى و كله من استهتارنا اننا نشوف حالات ..

فيه ايام فى الاسبوع بنحضر فى العيادات الخارجية اللى هى و انت داخل من الباب الرئيسى مش باب اسنان
على يمينك على طول هتلاقى بوابة بعدين يمينك هتلاقى بنك الدم ..

العيادات فى وشه على طول ..

(( نصيحة --- الايام بتاعة العيادات الخارجية من اروع الايام اللى هتمر عليك و لازم يكون عندكم انتوا من جواكم ال concept اننا نتعلم و هناك النواب مبيقولوش لا للى عايز يتعلم و بيشرحوا فلازم الصبر و انك حتى بعد ما يخلص الراوند ( اللى هو الشرح اليومى يعنى بنسميه راوند مش محاضرة ) ممكن تقف وراء النائب و تشوفه و هو بيmanage الحالة و الله هتفرق معاكم جداااااا))

اولا ده مش obligatory عليك يعنى حاجة تعملها و انت عايز كدة
ثانية هى مرهقة شوية لانك هتلاقى الدنيا ضيقة شوية و الناس اللى زيك كتير و انا كان ليا كلمة شهيرة جدا فى الموقف ده و كلكم هتعدوا عليه
( البقاء فى حجرة الكشف و خاصة بتاع ال ent للاقوى و الاصلح ..)

المهم هو ده نظام الشرح العملى و طبعا فيه slides لان فيه امتحان عليها فى آخر السنة


- 5 -
اخيرا بقى الدكاترة


و مااااااااااااااا ادراكم ما دكاترة الكلينيكال

طبعا مع كل احترامى للدكاترة اللى درسولنا سنين ال basic و ناس افاضل
و لكن الميزة بتاعة دكاترة الكلينيكال
1 - ذهنهم حاضر و تلاقيهم كدة فاهمين الطلبة.
2 - ذوات شخصية رهيبة دايما لهم كاريزما ( طبعا دول ناس قضوا حياتهم بين البشر )
3 - خبرات طبية و حياتية رهيبة ,


كل ده بس علشان اقولكم داوموا على حضور المحاضرات حتى لو انتوا بتاخدوا كورسات ..

هتفرق معاك جدااااااااا انك تتابع ال terminology بتاع الدكاترة لان هو ده اللى هما عايزين يسمعوه فى امتحان الشفوى

و شفوى الكلينيكال ربنا يستر منه
على قد ما هو سلس و ممكن يعدى فى هدوء
على قد ما ممكن احنا نعقده على نفسنا

ف take care ....




Forensic Medicine And Toxicology
الطب الشرعى و علم السموم
الطب العدلى
_____


لما نيجى نتكلم عن ال
forensic medicine and toxicology

او ما يسمى بالطب الشرعى و علم السموم


المادد دى مقسنة الى قسمين و كتابين

1 - كتاب forensic
2 - و كتاب toxicology


و طبعا الفرق بيبقى واضح ما بينهم الطب الشرعى اهتماماته او حدوده غير حدود علم السموم




- تقسيمة الدرجات

الدرجة الكاملة من 200
تقسم الى :
1 - درجات يتم الحصول عليها خلال الراوند و بتبقى كالآتى
25 درجة امتحان آخر الراوند و بيبقى نظرى
15 درجة بيبقوا على جزءين
( 5 درجات لعمل لوحة او cd بريزنتاشن او بحث )
( و 10 درجات على امتحان بيبقى غالبا فى المدرجات و بيبقى عن death certificate و wound report )

يعنى بيجيلك حالة يقولك الراجل ده كان عنده كذا و جاله كذا و بعدين مات
اكتبلى شهادة الوفاة .( طبعا متستغربوش كل ده هتتعلموه فى الفورينسك )

و يجيلك شكل جرح
تكتب تقرير عنه و برده متستعجلوش كله هيتدرس .

2 - درجات يتم الحصول عليها آخر العام :
100 درجة امتحان آخر العام
30 درجة امتحان عملى جارات و عينات و كل ما يخطر لكم على بال . ( انتوا هتستمتعوا جدا فى رحاب الموت و آثاره و ادواته )

30 درجة شفوى .


- نتكلم دلوقتى عن الاجزاء او بمعنى اصح هتكلم عن الفورينسك و التوكس ( و هى دى الاختصارات المتداولة بين الطلبة :



( forensic medicine )

يبقى بنتكلم عن جثث
و موت و بلاوى و مصايب

و انت مطلوب منك انك تفسر كل بلوى و كل مصيبة من دول و تستخدم ما سوف تتعلمه من الطب الشرعى فى تفسير

1 - كيفية الوفاة
2 - توقيت الوفاة
3 - احيانا من الجانى
اذن المادة دى بتديك ادلة و علم يستخدم فى العديد من الحالات التى تستوجب معرفة كيفية و زمن الوفاة و احيانا مش لازم يبقى حثة ممكن تعرف مثلا الجانى فى حالات
الضرب
الاعتداء ( الجسدى - الجنسى )
بأختصار هندرس ايه فى الكتاب ده او فى الجزء ده ..؟؟!!!



من الآخر هو ده الفهرس بتاع الكتاب و هى دى مواضيع الفورينسك



( toxicology )

اعتبروها امتداد للفارما لانك تقريبا بتدرس التوكس بنفس اسلوب الفارما


يعنى الاول بتاخد جينيرال توكسيكولوجى و فيه هتتعلم ازاى ت diagnosis
و management للحالات بتاعة التوكسيكولوجى

بتاخد الطرق المتعددة اللى المواد بتتفاعل بها و ازاى ممكن المادة دى تشتغل

و ان فيه local و systemic

ازاى اللوكال يشتغل و ازاى السيستيميك

بعدين هتدرس المواد المختلفة و
1 - brand name او اسمائها المتداولة بها فى الاسواق
2 - تأثيرها على الجسم عامة .effect
3 - ايضا pharmacological effect ...
4 - استخداماتها المختلفة .
5 - هل حالات التسمم به يتبع ( الحادث / القتل العمد / الانتحار )
لان فيه حالات مينفعش الانسان يتسمم بالمادة دى غير لو كان حادث يعنى مش مقصود .. حالات اخرى مينفعش يكون غير انتحار
حالات اخرى مينفعش يكون غير قتل عند يعنى واحد قاصد يقتل واحد تانى ..
6 - هناخد ايضا local و general effect يعنى شكل التسمم به عامل ازاى ..؟؟!!
7 - اخيرا بقى postmortum effect او شكل الميت ازاى و ازاى نعرف ان ده مات بالمادة دى ..
8 - investigation و diagnosis و treatment .

- ده كان اللى هندرسه فى التوكس
كل موضوع تقريبا هيتقسم بنفس التقسيم ده ..

طبعا المواد بتاعة التوكس كثيرة و منها ما هو نباتى و منها ما هو حيوانى و منها ما هو صناعى ..بس للاسف الكتاب ضاع منى و مش عارف اصور الفهرس

(( هكمل بعد شوية متناموش ))

كنت بتكلم عن التوكس ...

طبعا الشباتر بتتقسم على حسب المادة السامة او التى تؤدى الى التسمم


- هنذاكر منين :


كتاب القسم كفاية جداااااا


و مداد تيم احيانا بينزلوا شيتس فيها ملخصات جميلة و بتبقى بنفس طريقة شكرح د / شيرين



- مين الدكاترة .. و اسمع لمين :

معظم دكاترة الشرعى كويسين


بس طبعا فيه ناس سمعتها وصلت للقمر
و يفخر قسم الطب الشرعى بأن دكتورة شيرين تكون عضو من اعضاء التدريس

دكتورة شيرين ... طاقة متفجرة بكل امانة
فقبل ما تكون اهم من يعطى كورسات فى الطب الشرعى
فهى من انشط الناس داااااااخل الكلية قبل ما تتجه خارجها

بكل امانة لا يفوووووووووووتكم اى كلمة تخرج منها ..

1 - بتنزل محاضرات
2 - بتدى عملى و بتشرح فيه بضمير جدااااااا
3 - احيانا بتدى محاضرات لو فيه طلب من الطلبة انهم مش فاهمين جزئية معينة فبتنزل يوم او اكثر تشرح .
4 - بتعمل مراجعة شاملة فى الكلية آخر السنة
5 - بتدى دروس برة الكلية .

و طبعا شرايطها من اهم ما ستجده فى رابعة كلهاااااااا

(( و لكن الحلو ميكملش -- على الرجال خاااااااصة تحمل ضمير المؤنث بعد كل كلمة تتفوه بها الدكتورة ))

لانها بتشرح بصيغة المنادى المؤنث يعنى ممكن تقولكم مثلا ..

(( يبقى لو لقيتى ال skin تحول لونه لكدة على طول تفكرى انك تعملى صورة آشعة على كذا و بعدين متتردديش لازم تيديله على طول كذا و بعدين تبلغى اهله كذا و كذا ))

لكم الله يا رجااااااااااااااااااااااال

و طعا القسم فيه العديد من الدكاترة المحترمين جدا و فعلا علمهم واسع .

و لهم منى كل احترام و تقدير
انا بس اتكلمت عن انشطهم و ده معروف داخل القسم قبل ما يكون خارجه .

نسيت اقول ان د / شيرين بتنزل كتاب ام سى كيو و اسئلة
و طبعا مبتنزلش كتاب نظرى علشان ميتضربش ..

فيه ايضا الدكتورة الكبيرة .. عبير زايد
من الوجوه النشيطة ايضا و لها كتاب ام سى كيو ..محترم

(( اخيرا بقى دكتورة هبة قطب بتدى كان محاضرة كدة على الماشى ))

انا قلت الشىء بالشىء يذكر .



- العملى :

العملى عندكم هيبقى
1 - جارات سبيسمينتز يعنى عينات
و بتقسم على حسب نوع العينة
يعنى فيه جارات wound و جارات head injuries و جارات infanticide و جارات toxicology و جارات general و جارات firearm و جارات asphyxia


و طبعا فيه blood specimens و عينات نباتات و جذور و اوراق تحت بند التوكس

و جزء مهم firearm رصاصات و اظرف و gun powder و shots
و كل ما يلزم الاسلحة النارية و كل ما له علاقة بأستخداماتها .

- نصائح شخصية :



الجزء ده جديد مكانش فى الدليل بتاع ثالثة


و حبيت اقولكم فيه بالنقاط المحددة نصائح قد تبدو لى ذات اهمية
ممكن متحسوش انها مهمة و فيه ناس هتحس انها مهمة

و كل واحد حر ياخدها زى ما هى / يعدل عليها / يرفضها كليا ..

براحتكم
1 - المادة مش كبير .. سلسة خاصة جزء الفورينسك
2 - خدوا بالكم من التوكس كتير بيقعوا فيه و انا اولهم (( متقلبوش عليا المواجع ))
3 - العملى مهم الى حد ما .. متتخضوش من الحجم اطلاقا .. النظام اهم حاجة تتمسكوا بها علشان يعدى على خير ..
4 - المادة دى لو عرفت تقرأها مع راوندات تانية (( من اللى يستحملوا يتقرى حاجة معاهم يعنى )) ممكن تقرأها هتستفيد
5 - لو انت بدأت الراوند الاول بالشرعى سلاح ذو حدين
اولا ـــ لانك واخد مادة صغيرة شوية و ممكن تعمل كويس فيها
لكن لو محاولتش تعمل حاجة فى الايام الطويلة بتاعة الشرعى يبقى فقدت وقت مهم ممكن تقرأ الكوميونتى معاه ..
6 - اخيرا بقى اللى هيستخف بالشرعى طول السنة .. الشرعى هيستخف به فى وقت صعب اوى

فى الامتحااااااااااااان



الرمد


دي تعتبر اصعب ماده و لازم تتذاكر من اول راوند و لو بسيط ومتتسابش في الراوند بتاعها بس

الحضور مهم جدا ومفيد جدا

والدكاترة ممتازين

حاول مش يفوتك ولا راوند واحد

الكتب:
في كتاب القسم
وده كويس بالنسبه للنظري بس مش الشفوي
كتاب د.ياسر
وده كويس بالنسبه للشفوي...ولو عشان النظري يبقى لازم تتكتب فيه الزيادات اللي بيقولها د.ياسر في الدرس "و الكتاب موجود على النت كمان"
كتاب د.احمد سعيد
بيقال زي كتاب القسم

الدروس:
في د.ياسر "في شرايط على النت بس قديمه شويه"
د.احمد سعيد "في الشرايط بتاعت السنه اللي فاتت "
الرمد سهل لو اتذاكر اول باول ... يستحسن يتشاف صور للحالات ودي موجوده على النت

الامتحان الحمد لله بيبقى سهل "بالنسبه للنظري و العملي"
الشفوي محتاج شوية مذاكره زياده بس الحمد لله درجاته مش كتيره



بالنسبة للوحدات


في وحدة الدكتورة فادية الجندي و هي دكتورة طيبة جدا

و محترمة جدا , و الدكاترة بصراحة ممتازين زي الدكتور حازم ياسين و الدكتور كريم و الدكتور حاتم , و المدرسين كمان

كويسين , الغياب طبعا انا اساسا مانصحش بالغياب في راوند كلينيكال يعني لو مش هنشوف عيانين دلوقتي هنشوفهم امتييييي؟؟

العيانين موجودين دايما في الوحدة المهم اعرف يوم العمليات امتي و اليوم اللي بعديه العيانين كلهم بوست اوبراتيف فعينهم

متغطية ( ممكن تغيبه اليوم ده ) العيانين بتوع الرمد مش كرونيك يعني مش هتدفع فلوس علشان تكشف اغلبهم ناس طيبين و

موجدين في العيادة و في المستشفي , انا شخصيا لما ما كانش في عيانين في وحدتنا كنت بروح وحدات تانية . و خليك جرئ و

دوس معي العيانين ولا يهمك .

الامتحان بيقي في المنهج كله خصوصا انه شفوي يعني الدكتور ممكن ياخدك في المنهج و يجيبك مرتين تلاتة بس برده هما ناس

محترمة جدا جدا جدا , الاند راوند عليه 50 درجة و نظام الامتحان مختلف و ممكن تشوفوا موضوع الرمد هتلاقوا كل المطلوب

عن نظام الامتحانات في اغلب الوحدات.

شوية نصائح , العيانين يا جماعة بني ادمين ولا هما عظم ولا جثث ولا فئران تجارب , فا محدش يتلم علي العيان و سبعة تورش

بقي في عينه لا واحدة واحدة و هتشوف مرة و اتنين و تلاته .

الشيت يا قوم , الشيت يا بشر الشيت يا ناس , اتعلم ازاي تاخد شيت مظبوط الموضوع مش صعب ولا خرافي شوية تدريب , و

جرأة و تعامل كويس هتلاقي نفسك تمام و لازم تفهم هتكتب ايه بالظبط علشان ماتكتبش كلام مش راكب علي بعضه .

ذاكر اول بأول و إلا هتتزنق جامد في الاخر و ركز علي الجانب الكلينيكال اوووووووووووووووووووووووووووووووووووي.

الرمد مادة في منتهي الجمال , فهم اوي اوي اوي , و الكلام مش صعب يتحفظ , بالمناسبة ذاكروا من كتاب الدكتور ياسر .

المراجع --- كانسكي ثم كانسكي ثم كانسكي لو عايز تفهم رمد بجد زي ما قال نايت . و فيه اطلس اكثر من رائع

اسمه اوفثالمولوجي بوكت اطلس .

ازاي هتكشف علي العيان ---- اهو هو ده الشغل الكلينيكال ازاي هكشف علي العيان ؟؟؟؟ ركزوا اوي في الموضوع ده , ازاي

اكشف علي الجفن و القرنية و القزحية و الكلام ده مهم اوي اوي اوي اوي اوي ( لو مش علشان الامتحان علشان لما تبقي

دكتور )

الدياجنوزز مش ازمة في الغالب محدش فينا كان بيغلط فيه . اعرف النقطة اللي فوق هتلاقي اللي الدياجنوزز بيقول انا اهه .

العمليات---- ما فيش عمليات غالبا في الرمد مش هيخلوكوا تحضروا لانكم لا مؤاخذة ( سورس اوف اينفكشن ) يعني ممكن العيان يجيلوا ( اندوفثالميتس ) فا يوم العمليات غالبا اجازة . ( في وحدة الدكتورة فادية كان التلات , و الاجازة كانت جمعة و تلات , و في شغل السبت )





E.N.T



من اسهل المواد
كتاب د.مسعد هوه المتفق عليه لان مفيش كتاب للقسم
متهيالي مش محتاج لدرس...بس اللي عايز د.مسعد بيدي درس و كمان في شرايط على النت بس قديمه شويه

الامتحان العملي و الشفوي بيبقو كويسين
بس لازم في الراوند تشوفو ا بالاوتو سكوب عشان الامتحان وهمه كلهم كام حاله معروفين "غالبا"
وبرضه يستحسن يتشاف صور للحالات سواء على النت او في الراوند
بالنسبه للنظري بتيجي احيانا حاجه بره كتاب د.مسعد...سواء من المحاضرات او غيره
واعتقد بيبقى في تدقيق في التصحيح


معلومات اخرى

1-لا يوجد غياب فى معظم الوحدات _ان لم يكن فى كلها على ما أظن_....
يعنى..
كل واحد ينام على الجنب اللى يريحه
أصدى..
كل واحد يحضر فى المكان اللى يريحه

2-حسب معظم الاراء..وحدة دكتور محمود عبد الرؤوف أحسن وحدة ...من حيث الحالات الكلينيكال اللى ممكن تشوفها
3-كل وحدة لها يوم واحد فى العيادة الخارجية..ما عدا وحدة دكتور محمود فهى الوحيدة التى لها يومان فى العيادة
4-دكتور عصام يومه ممتع جدا يوم الثلاثاء فى العيادة الخارجية(ده طبعا تبع وحدة دكتور عصام )
5-دكتور محمود فوزى_تبع وحدة دكتور محمود_شرحه رائع جدا....بيشرح نظرى فقط وقلما يدخل حالات...وده يوم السبت
6-بالنسبة للمذاكرة...شراط دكتور مسعد وكتابه هيوفوا بالغرض وزيادة
7-دكتور مسعد_تبع وحدة رضا أمين_بيشرح يوم الاثنين


8-لو جبت OTOSCOPE ..ده هيفيدك جدا..........بس يا ريت لما تشتريه تجيبه ألمانى..أى نعم هوا غالى شوية بس الصراحة هتحس بالفرق وهتدعيلى(ودى نصيحة واحد شاف كتير بال OTOSCOPE )
فيه نوع اسمه RIESTER بيتباع بحوالى 275 جنيه وده جامد جدا

8-طبعا ممكن تحضر عمليات...ويا ريت تتفرج على العمليات الcommon زى tonsillectomy and adenoidectomy

طبعا لو حضرتك غاوى أنف واذن وحنجرة اوى وغاوى عمليات كبيرة
عندك دكتور اسمه لؤى_بيكون يوم الأحد تبع وحدة دكتور محمود عبد الرؤوف_بيعمل عمليات total laryngectomy
والعملية معاه يا دوبك بتاخد من 6 ساعات وانت طالع



community




النظري سهل بس كبير شويه...اعتقد الكتاب صغر دلوقتي

بالنسبه للكتب
كتاب القسم
و كتاب د.عماره
بس انا انصح بقراءة كتاب القسم لان رئيس القسم مبيحبش كتاب د.عماره و بتجيب اسئله براه

بالنسبه للدروس
د.عماره
اعتقد برضه في شرايط على النت
و في كمان شرايط مراجعه القسم


الروند لذيذ رغم ان فيه شغل كتير من ناحية الزيارات و المؤتمر اللى بيتعمل فى الاخر بس كلو بيعدى

اولا الطلبة بيتقسمو 6 مجموعات من 1 الى 6 و كل مجمموعة بتتقسم تلات مجموعات ايه و بى و سى

يعنى مثلا بتبقى المجموعة اسمها وان ايه او تو بى و هكزا

كل مجموعة من دول بتبقى فى حدود 20 طالب

فى اول سيكشن اسمه ليدرشيب بيتم اختيار ليدر و كوليدر من المجموعة نفسها

كتاب العملى فيه فى اوله كل الاحداث اللى المفروض تحصل فى الروند و درجاتها مكتوبة ادامها

و فى زيارات لمستشفى الحميات و مطبعة الجامعة و القرية و المركز الصحى و فيها cspm

اللى بيبقى الواحد معاه استمارات لاسرتين من الاسر فى منطقة معينه و بتعملو معاهم الquestionnaire اللى فى كتاب
العملى

و على اساس المعلومات اللى بتتجمع دى بتكملو الspreadsheets اللى فى الكتاب و تحسبو الحسابات

و على هذا الاساس بتعملو powerpoint presentations كل حسب الموضوع اللى بيتحدد يعنى ممكن مجموعة تعمل diabetes or hypertensio or child and health care,etc..

ايه تانى؟؟؟ ايه تانى؟؟؟
اها
امتحان الospe اللى هوا فى مقام الpractical ب10 درجات
و بيكمل ال60 درجة بتوع الpractical اللى 50 درجة منهم بيتلمو خلال الروند

و بعد كدة فى امتحانend round ب 60 درجة




بالنسبة لموضوع الليدر والكوليدر


الميزة الاساسية فى الموضوع ده انه الليدر والكوليدر بياخدوا درجات العملى والشفوى كاملين .. ده زى مكافأة ليهم على تعبهم طول الراوند ..
طيب تعبهم طول الراوند ده بيكون عبارة عن ايه ؟؟ او ايه هى وظيفتهم ؟؟
بيكونوا حلقة الوصل بين القسم وافراد المجموعة .. يعنى بيكون معاهم ارقام تليفونات افراد المجموعة كلها وبيبلغوهم بأى جديد او اى حاجة طالبينها الدكاترة .. وبيكونوا مسئولين عن اخد الغياب كل مرة فى الراوند ..
طيب يعنى من الاخر حلوة وللا مش حلوة ؟؟
بغض النظر عن موضوع درجات العملى والشفوى فهى حلوة لأسباب منها انها تجربة جديدة وغير انك هتبقى مثلا معروفة بين دكاترة القسم ..
المشكلة اللى ممكن تقابلك هى انك انتى اللى هتدورى على الاخبار بنفسك وتقوليها لأفراد مجموعتك .. يعنى هتلاقى ان معظم دكاترة القسم مايعرفوش حاجة فلازم انتى تسألى عن دى وعن دى وعن دى وعن دى .. عشان محدش من الدكاترة فاهم حاجة عن نظام العملى ( طبعا مش قصدى المادة العلمية ) ..بس اقصد تنظيم العمل بين افراد المجموعة ..
يعنى مثلا اخر الرواند كل مجموعة بتعمل بريزنتاشن عشان يتقدم فى المؤتمر وحاجات كدة .. ده محدش قلنا عنه ولا كلمة من الدكاترة .. يعنى محدش قلنا لا هنعمل ايه ولا هنرتب ازاى ولا اى حاجة خااااااااااااااااااااااااالص ولما نسأل اى حد يقولنا مش عارف وهتلاقى نفسك فى الاخر عمالة تجرى ورا ده وورا ده .. ماعرفش هو يمكن هيكون فى نظام اكتر وترتيب احسن الراوند ده .. بس انا بقولك اللى حصل ..
بس تعرفى دى والله مش المشكلة .. المشكلة انك هتلاقى فرد من افراد المجموعة مثلا كان نفسه يكون الليدر .. فهتلاقيه مستنى اى غلطة عشان يعملها موضوع .. يعنى بيكون مفكر ان الليدر والكوليدر عارفين كل حاجة ومكسلين يقولوا !!!!
بصى انا طبعا مش بعمم الكلام ده .. اكيد طبعا دول قلة قليلة نادرة .. ده كان فى مجموعات تانية ماكنش فيها مشاكل والحمد لله كانت متعاونة جدا ..

يعنى لو كل فرد فى المجموعة عرف مهام الليدر ايه بالظبط وتعاون معاه .. ان شاء الله مش هتكون فى مشكلة وهيكون روند لذيذ جدا جدا


تم بحمد الله